Kohët dhe vendet e ndaluara për namaz

Kohët kur ndalohet falja e namazit

Profeti (alejhissalatu uesselam) në disa hadithe të sakta na ka treguar se gjatë ditës janë disa kohë në të cilat është e ndaluar të falet namaz. Bëhet fjalë për namazet vullnetare, ndërsa namazet që kanë shkak të dukshëm — siç janë namazet kaza, sunetet e përshëndetjes së xhamisë etj. — lejohet të falen edhe në këto kohë.

Kohët e ndaluara janë:

• Që nga falja e namazit të sabahut deri në lindjen e Diellit.
• Nga fillimi i lindjes së Diellit deri në ngritjen e tij në qiell sa një heshtë.
• Kur Dielli shkon në zenit (në kupë të qiellit).
• Që nga falja e namazit të ikindisë deri në perëndim të Diellit.
• Nga fillimi i perëndimit të Diellit deri në perëndimin e plotë të tij.

Shënim: Kur muslimani gjendet brenda territorit të xhamisë së shenjtë, Qabesë në Mekë, e ka të lejuar të falë çfarëdo namazi në çdo kohë të ditës dhe të natës.

Vendet ku është e ndaluar të falet namazi

• Varrezat. Profeti (alejhissalatu uesselam) e ka ndaluar namazin mes varreve, si dhe namazin në drejtim të tyre.
• Vendi ku hidhen plehrat dhe mbeturinat.
• Thertoret ku theren kafshët.
• Banjat publike (përfshi vendet ku kryhen nevojat personale).
• Stallat e deveve.
• Mesi i rrugës apo udhëkryqet ku vërshojnë njerëzit.